Athugið, athugið sýning Ásgeirs Skúlasonar í Norr11

Apr 12, 2021 | Listir & menning

Athugið, athugið sýning Ásgeirs Skúlasonar í Norr11

Ný myndlistarsýning opnaði á vegum Listvals á dögunum í Norr11 Hverfisgötu 18 með verkum eftir Ásgeir Skúlason. Sýningin heitir Athygið athugið og sýnir Ásgeir ofin textílverk þar sem hann notar krullubönd sem flestir þekkja og eru notuð utan um gjafapakka. Hann notar þriggja ása aðferð svo úr verður ísometrískt munstur sem skapar þrívídd á tvívíðum fleti. Munstrið endurtekur sig út allan ramman og skapar sjónhverfingu. Hin verkin á sýningunni eru veggskúlptúrar gerðir úr teypi sem hann rúllar í óteljandi hringi.

Verkin einkennast af þráhyggjukenndri endurtekningu þar sem Ásgeir leitast við að fanga athygli áhorfandans en titill sýningarinnar vísar einmitt í þessa þörf til að fanga athyglina, hvort sem það er í augnablik eða til lengri tíma. Verkin láta við fyrstu sýn lítið yfir sér en þegar nær er komið sekkur maður inn í myndflötinn.

Ásgeir Skúlason f. 1984 býr og starfar í Reykjavík. Hann lauk fornámi við Myndlistarskólann í Reykjavík áður en hann hóf nám í Listaháskóla Íslands og útskrifaðist þaðan 2013 með BA gráðu í myndlist.

Sýningin stendur til 10. maí og er í Norr11- Hverfisgötu 18.

Verkalista má nálgast á vefsíðu Listvals.

listval.is

Lilý Erla „Lover of unexpected magic”

Dec 1, 2020 | Listir & menning

Lilý Erla „Lover of unexpected magic”

Lilý Erla Adamsdóttir er ung listakona sem Innlit hefur tekið eftir á samfélagsmiðlunum fyrir lifandi og skemmtilegar sögur. Skapandi heimur hennar og skemmtilegt stúss birtist áhorfendum. En oftar en ekki sýnir hún frá listsköpun á vinnustofunni og skapandi stundum með börnunum við eldhúsborðið heima. Girnilegum brauðum bregður fyrir ásamt fallegum heimilislegum smáatriðum. Lilý finnur listinni farveg á fjölbreyttan hátt í textíl, málverki og ljóðum, en hún hefur gefið út tvær ljóðabækur. Kvöldsólarhana og Biðu sem báðar eiga það sameiginlegt að vera kraumandi flaumur orða sem kastar lesandanum til. Lífið og listin leiðast hönd í hönd, enda er Lilý yfirlýstur „Lover of unexpected magic.”

Það má segja að verk Lilýjar Erlu dansi á mörkum myndlistar og hönnunar. Hún er textíl listakona og deildarstjóri Textíldeildar Myndlistaskólans í Reykjavík. Eftir útskrift í myndlist frá Listaháskóla Íslands hélt hún til náms til Svíþjóðar þar sem hún lauk mastersprófi í listrænum textíl. Hefur hún verið að þróa sína tækni og myndlist frá námi.

Lilý Erla hefur hlotið athygli fyrir áhugaverða nálgun við viðfangsefnið en hún er m.a. nýbúin að opna einkasýninguna Skrúðgarður, í Listasafninu á Akureyri þar sem hún sýndi textílverk sín. Sú sýning stendur fram til 15. Ágúst 2021. Verk sýningarinnar eru mjög fjölbreytt hvað varðar útfærslu.

Þar var hún með veggverk, verk á gólfi sem eru þá kannski komin í hlutverk skúlptúrsins og verk á þaki safnsins. Tvo verkanna eru gosbrunnar. Verk eftir hana hafa verið sýnd víða, bæði hérlendis og erlendis. Verk eftir hana er að finna meðal annars á yfirstandandi sýningu á Listasafni Íslands, Listþráðum. En Lilý er að opna sýningu í nýrri sýningarröð Listvals í samstarfi við Norr11 nú í byrjun nóvember.

Sem fyrr segir hefur Lilý fundið farveg fyrir listsköpun sína á fjölbreyttan hátt. Eitt af því sem hún hefur verið að gera undanfarið eru mjög heillandi, falleg og húmorísk veggverk, einskonar handmáluð veggfóður. Í fyrstu virðist sem veggirnir séu veggfóðraðir á hefðbundinn hátt, en þegar betur er að gáð er allur veggurinn handmálaður af natni og alúð.

Hér að neðan eru verk úr smiðju Lilýjar Erlu. Textílverkin hennar eru af ýmsum stærðum og umfangi, og veggverkin gjarnan sérsniðin að hverju rými fyrir sig. Þau sem vilja fjárfesta í list eftir unga, hæfileikaríka og innblásna listakonu geta skoðað úrvalið á heimasíðu og samfélagsmiðla síðum hennar. En linka á þessar síður er að finna neðst í greininni.

Aðalmynd með grein, sem og sú neðsta eru teknar af Sögu Sigurðardóttur. Myndin af Lily Erlu sem tekin er á sýningu Listasafns Akureyrar er tekin af Helgu Birgisdóttur og mynd(ir) af veggverki eru teknar af Kristínu Helgu Schiöth. Myndirnar eru í eigu listakonunnar og birtar með hennar leyfi.

Á sýningunni á Listasafninu á Akureyri